Kol Fonts

Kol Fongts aka ngaih rhoek hamla, Kol Fonts abuemboeih lah 150 thlai lo. Kol ca lah Design sai ham, Wedding Invitatio naw tel ham na ngaih atah Fonts athen then naw moeh om. Loh aka ngaih loh naloh thai. Zip Files lah kakhueh tih download na sai pahoei ah, na download tangte te voihit click sai parhap. Fonts atueng pahoei ah fonts te select boeih sai lang, right click duep, te ah te install tilah atel te om eh ni, tekah install te duep parhap, namah kah Computer dongah Font pahoei lut buet ni. Heah Duep

Download Sai Lang Honah Uh van mai lah.

Molhumsom

Read more »

Rhuet Thaih Aka Yoei Numhaica

Kholing kholai khawah Numhaica pakhat tah rhuet thaih a yoeih. Rhuet thaih lai ham akangaih thlang pakhat loh “ Nuham rhuet thaih heh saa aa?” A tinah.

Rhuet thaih aka yoei Numhaica loh “ a hingsuep ca ngai lah aka om  heh saa, ip-op-ap lah aka om teh saa nawh” atinah. 

Rhuet thaih titah aka saa koi lah a om dongah a kalai kung van loh khoseh Nuhmaica kah athui anglah hingsuep ngai lah bet a ka om a ka sa koi te thloep a tuek tih a lai. Thlang tloe rhuet thaih aka lai rhoek loh kho seh Numhai ca kah athui anglah hingsuep ngai lah aka om aka sa koi kak te atuek tih a lai dongah hingsuep ngai lah aka om rhoek te tlawp boeih tih ip-op-ap ngai lah aka om rhoek dueng te atang peh.

Rhaih a om atah athloe rhuet thaih aka lai ham thlang koe lo bal tih numhai ca na lah “ Nuham rhuet thaih he saa aa ?” a tinah bal.

 

“ a thaih yawl bet aka sawn ca tetah saa tih athaih tibangkawk lah aka om tetah sa ngai nawh” lat anah bal.

Rhuet thaih aka lai rhoek loh aka saa phun te atuek uh bal tih thlawp alai bal, tih rhuet thaih tibangkawk ngai te hut lat tang bal. 

Rhaih a om atah rhuet thaih aka lai ham thlang koe lo bal “ Nuham rhuet thaih he saa aa ?” a tinah bal.

“ tikhaurau ngai lah aka om te saa nawh , noepadawk ngai lah aka om teteh saa”  lat a tinah bal.

Rhuet thaih te kholing loh hap akeng ngai coeng dongah noepadawk ngaikak lah boeih a om peh coeng. Tih aka lai kung rhoek vanbal loh kho seh aka yoei kung kah a thui angla aka sa koi noe-pa-dawk ngai the a lai peh . 

Noepadawk ngai lah a ka om rhuet thaih te a boeih coeng atah, Im kah longah yoeih hamlah akhuen rhuet thaih te thlawp a yoeih thai tih Rhuet thaih a coih a om mueh lah im lah n’thlih ngaivang nah a om muehlah im lah mel. 

Rhuet thaih aka yoei Numhaica te caa khoh a ming moe nih. Tede amah kah bungkhutnah bii bi lah a om vengah tah a sai ham koi te aming. Tilah ka sai koi nih then eh ni, tite a bii bi loh a cang puei dongah boeih aming lah om.

Read more »

WESTERN UNION KALONGAH KOL KHO LAH TANGKA N’PAT THAI COENG

Delai han kah Ram (200) khawah tangka pat thainah yung aka khueh Western Union company loh kol kho ah khoh tangka pat na thai van hamla Myanmar Oriental Bank oenah oltluep nah akhueh rhoi coeng tilah olthang tunbu dong ka longah patoeng ming lah om.Western Union honah rhang oenah Ram Voel kalongah kol kho lah tangka phaisa n’pat thai coeng de catah Kol kho kalongah Ramvoel benlah lah n’pat thai thlan mue.

Western Union Company tah New York neh Mississippi Valley Printing Telegraph Company loh 1851 kum vengah ana tong lumha cuek. Te kalongah 1856 kum vengah tah the New York and Mississippi Valley Printing Telegraph Company tikah ming ka longah tahe kah Western Union tilah ming atho tih tahe he hil he kah ming he phat a ho nah lah om.

Western Union Company a om thlanah kol kho lah tangka phaisa pat hamla he hondi (ahuep tangka patna) he ho nalah om de catah tahe Western Union a om pahoei coeng atah kol kho lah khoh tangka ayoeica lah n’pat thai lah om coeng.

Kol kho lah tangka pat na ngaih atah na om nah huen kah Western Union Company te ah te cet lang tah kol kho lah tangka pat kangaih nah parhap angoengaih sai ham koi te Western Union ah bii aka bi thlang loh van thui buet ni.

Read more »

Tapvoep Coelca thlanah Poekhet lumha

He kong he n’huk vengah Matu Groups dongah voikhat tah ka thut coeng de tahe konglongsom blog dongah koep ka thut bal mai eh.

Hinkhat vengah mhawbi ka longah rangon khopuei khaw sule benlah ceh hamla ka cai. Bus a duemnah (Bus Stop) pha thlanah kho thlan khungdeng. Khangrhoep bal ah nithawng vik ka hilh tih lakphak dawr ah lawm ka kun tih rhaih k aba koep. Khothlan ahap neh Bus bawh na lah ka cet tih Bus ka rhing. Khothlan baw akai nuem Bus khoh va pawk hai nawh. Rhaih a om coeng atah Bus pakhat pacak va pai, maitung maitang ah Bus khaw lah lawm ka lut. Thlang khek be tih pai nah huen kang na khoh seh om nawh. Thlang kep ah ngangah ka ep tih thlalangawng benlah puk ka yuengyet uh tih amah tae ah te ka pai.  

Ka pai nah huen ka longah kamah kah tengvai te ka dan lauha tah cadong thahuem kum (30) thluk ngawn lo poen ni ke ngolhnah thuden dongah awpawp ngol te ka huh. Cadong pa teng ca teah patongca ( Kum 65 thluk) pakhat tah ngolhnah huen adang muehlah motor dong kah khawn atuk tih pai te ka huh. Cadong pa loh khoh a tengca ah patongca pakhat pai tite ahuh khoh ahuh aming khoh aming ngawn de catah tulah ngaiyaknah nawh. Motor so ka longah thlalangawng voel awpawp adan.

A tengah ngolhhuen a om muehlah patongca ngoepngoep apai te cadong pa loh aming lalal mai ah ngolh huen ahoep peh nawh te bus dong kah aka om thlang naw loh ahuh vengah cadong pa te vawmvawm atap avoep uh.

Khatsut loh tah “ thlang-ang, atengah patongca apai  aming lalal mai ah ngolhuen khoh hoep peh nawh” titih ngomngom a cai thil uh, khatsut loh atap avoep uh. Thlang naw kah atap avoep ol khoh seh cadongpa loh ayak ngawn de ca tah tu lakhoh sak nawh, a kaya mueh lalah lah a om tak.

Rhaih a om vengah tah, arhumnah huen apha coeng dongah patongca tah vik rhum, tede cadong patah amah ngolhna ah amah yayah lah te thlal ngol. Khangrhoep bal ah patongca arhum pahoei ah huta bungvawn pakhat tah motor so lah va luei hang tih patongca apai nah cadong pa teng te ah patlawt pai bal. Cadong pa loh bungvawn hut ate khoh angai nah mueh lah thlalangawng poeng ben lah hoei amel tak bal.

Tapek patongca ngolhhuen apeh uh nawh vengah cadongpa vawpvawp aka tap rhoek kah tapvoep nah te thui soeh voel boeh, tapek kah lak ah ep atap avoep uh bal coeng. “ Anih cadong thahuem aih boel tah huta bungvawn naw tah angolh sak aih mai ve tih amah keh pai aih mai mako” titih vawmvawm a tap uh acai angong thil uh.

Tih, rhaih a om atah cadong pate a rhum nah huen apha val poen ma ke, bus duem nah huen apha vengah tah yityutyat yueng uh tih Bus dong kalongah rhum ham lah pai hang. Tapek kah cadong pa aka tap ka voep naw boeih amik duih ahuel tih cadong pa te sup a sawt uh. Cadong pa loh tu aka ming nawh anglah amah aka so rhoek te caih a nueih thil tih Bus dong longah rhum hamla Bus thawtka ben lah cet. Kai van khoh she cadong pa te ka huh ka sawt het dengah khaw kahuei uh van. Thlangca akho pahit bok angun main a lal ah metiangle a pai thai van rhap pai eh ke. Cadong pa tah akho pahit bok a ngun peh coeng tih thing canghol ( khongun naw loh aho nah ke) oen ni a ceh.

Cadong pa kah a kawng akhuicing a cim hetlah ming thlan vengah tah cadong pa te thlangthen nawh lah poek taloeng de ha catah cadong pa te khongun rhaw pai kawn ke tilah aming pahoei coeng atah a lungbuei khaw dikdik ka yut uh. Ka camaw veng kah Nu Pa ol lawt ka poek tah “ thlang tamdeng boeh, Thlang tapvoep boeh, thlang pakpak coelca boeh, khosi boeihboeih te namah teng lah nil at ahoi u eh” koekoe  thuituen nah ol te lawt ka poek.

Tih, kathui ngaihnah tah thlang kah a om a ih n’ming het thlan mai ah “coi ni ” tikah mah kah poek nah mai lai oenah  thlang n’coel n’ca, n’tap n’voep atah a doeng thaihu lah pawk thai ma nawh. Tilah asai ma ko tilah ati mako n’ti khing lak ah “ kai koi nih ka ti thai van poek eh ya” titih kopoek tal oen khoh apai huenah n’pai koi nih then eh ni.  

Read more »

South Korea Kah Lumha Cuek Ram Ukkung Boimangnu

South Korea Kah Lumha Cuek Ram Ukkung Boimangnu

South Korea ram ukkung boi tuekna tah 19 December 2012 hin vengah a sai tih te ukkung boi tuek na ah  Conservative Party kah Park Geun-hye loh Democratic United Party kah Moon Jae-in teh met a ta dongah Park Geun-hye tah lumha koek South Korea ram kah ukkung boi Huta lah om coeng.

South Korea ram tah 1948 kum vengah Japan kut khaw ka longah ram loeihna a dang. Ram loeihna a dang coeng ka longah Syngman Rhee (August 1948 to April 1960) loh a uk hang. 1962 veng atah ralkap boi Park Chung-hee loh uknah a-na vik a hul peh tih South Korea ram tah ralkap ukna oenah kum 1978 kum hil (18) khaw a uk hang. Korea sawsang seng camaw rhoek loh ralkap ukna te angaih u nawh dongah 1979 kum vengah sandah apiah uh. Te veng kah sandah piah na dongah thlangmi 2,000 thluk loh Democracy hamla a lu avoeih.

Park Chung-hee, ukkung boimang ka longah a thlak van neh Chun Doo-hwan (Ralkap Boi bal)  loh thlek ah ukkung ngolh huen thloep angolh doelh. 1980 kum vengah tah seng camaw rhoek ddueng voel mueh lah korea rhangpuei sandah piahna dongah thum uh tih Democracy a bih uh. Ralkap boi rhoek loh a-naa a hul na heah thlangping toek lek nawh mai a thup de catah korea rhoek rhangpuei kah a rhai na khaw ka longah tha huel na rhang oenah a noei ben atah Democracy uk nah puk a dang uh thai. Democracy a long a im lah ukkung boimang tuek nah tah 1987 December 16 hin vengah a sai tih Roh Tae-woo loh met ata dongah Roh Tae-woo tah Democracy a long a im lah South Korea ram ukkung boimang lumha cuek a bi.

Korea ram ukkung boil ah Ta kum ah met a ka ta  Park Geun-hye he tah thlang thawt mai lai van moe nih. Korea ram ralkap uk nah khaw ah a ka det cuek ralkap boei Park Chung-hee kah a ca nu ni. Park Geun-hye tah ana pa loh Korea ram a uk vengah a kum (22) lo tih tahe kum (60) vamueh hula rhang pakhat lah om.

Korea ram kah Democracy bih nah oenah tahe mamih kol kho kah Democracy bih nah he bet ah a ka lo arhoi anglah a om dongah he kong he ka thut van mai ni.

Read more »

Cuihna Miktleng

            Cuihna Miktleng

Thlanghing kah mikdi loh apha mueh ketah mirror (mhanbilu) oen n’sawt thai de ca tah N’hailam kah aka lo ham koi n’huhnah thai hamlah tah mirror (mhanbilu) oen ah n’huh thai sawt thai lah om nawh. N’hailam kah aka lo ham koi awt n’huhna thai hamla tah Cuihna Miktleng angoe. Cuihna miktleng naw atah palnam rhapui mawt thai ma nawh, coengah cuihnah miktleng a khueh mueh thlang pakhat he huimawt kung (leader) paihuen ah khoh pai thai nawh mue.

Hailam sawt nah ham cuihna miktleng kawng he olpui lah thui ka ngaihna tah US ram kah Ram thloe oen thloetlang kung laipai (Foreign Minister) lah aka om William H. Seward kawng he bet thui hamla ka ngaih.

American ram kah states (50) khawah Alaska ram he aka len koek state pakhat lah om tih akau 587878  Area (Sq Miles) len. 1967 kum vengah US ram kah Ramtloe oen atloetlangna dongah laipai lah aka om William H. Seward loh Russia kut dong ka longah Dollar 7.2 million oenah a lai. Parliament khawah Alaska kho lai ham kawng thuicaihna akhueh uh vengah khatsut loh “he kah Alaska kho alai nah he thlangang kah khokhanna, tangka poekyakna lah apoek, He kah Alaska ram lai na loh US hamla aphu tetca khoh om nawh, US ram atha ep ayawkna ham mai ni, US ram ham mingthen khat khoh ka om eh ati moe nih ” titih moeh ah akalh uh tih a oelh u. Taktak akhoh amah tevengah Alaska ram khaw ah bangpai khoh a om moe nih, lunglai khoh then nawh lai lingvawk oen cathling kung naw ni hut aka bae.

William H. Seward loh “ He kah ram he lai lingvawk lah thlingha kung oenah a bae mai satoe khoh lo seh olpuei moe nih, he huen he mol dongah mamih kah poekna, n’ngaihna n’ling thai n’suen thai ehya teni olpuein” tilah ol alan.William H. Seward loh Alaska ram he alai mai lai moe nih. Hailam ham lah kho apoek oepsoeh tih ni a lai tite tahe tah a cimca lah tueng.

Alaska state he US state boeih khawah aka len koek state pakhat lah a om dueng mueh lah yenan, Gas oen athloethloe lai dong kah aphu aka om thaihu aka sawk huen lah khoh a om coengah US ram kah state boeih khawah pathum na ah aka boei koek state pakhat lah khoh seh om bal.

Delai rhalpuei athoh dongah Russia ram tah rhal sung tih tangka phaisa akhueh nawh dongah Alaska ram he US tengah asum asae lah ayoeih. William H. Seward loh apuei apo naw kah tamdeng tamkha moeh ana yok de catah hailam ah aphu aom ham koi te acimca lah ahuh poen dongah thlangang ming aphawh, thlangthe ming aphawh.

Teveng kah William H. Seward loh ahuh nah anglah apuei khatsut loh tahe kum (20-30) a di veng dengah ni ahuh thai pueng. Apuei Khatsut bal loh tah thlanmol khum tih ahuh ma teng ahuh thai voel moe nih. Tahe tah William H. Seward loh aling sut ngaiuepna oen apoeknah tah paw tih thaih coeng tite William kah bii bi puei haih rhoek dueng muehla US rhangpuei loh khoh seh aming thai.

Read more »