Ringma Ca Zaan Cil

                                                               Ringma Ca Zaan Cil

By: Saya Awkla Bik

He laihaan ah thlanghing lawng khaw ana sak cyk vengah thlangdy thli te phyl ah hai on ana tih u de, " Tui Domdo" ati u athum hin ah kokthok kokthok valaw poepa ti. Te tila selkhui thlaangthi kop kop a lawna u tah Mawpi aka mingna selkhui aka hungkung bawi ana awm nawh dawngah amah ngaih ngaih lah cet u tih amah ngaih ngaih ah mel u, tila ana thui u.

Tede hin at khawhin atah tawngpa khat a dyk tawm vengah a zu tengah he tila awln yyn. " Kaitah ka dyk pon ai, Tui Damdo athum hinah kop kava law ai, te dawngah im ah ana awm lang tah buh sut avan khyh, nga ngan van thaawng langtah n'ring ne" a tina. Tede a zu lawngah tang na nawh. A va tah athui angla dyk tang long tih phul ah a tih u. A va lawng " athum hin vengah kop ka law ai" a tina awl te tula khaw sak peh tlaih nawh. Im ahkhaw ana awm peh nawh, Zusuk, zubuihna ah tawngpathli on awmtheen u.

A thumna hin atah awl a yynna angla tawngpa te thlembenah im la kop va mel tanglong. A zu tah ana awm peh nawh. A ca rawi byng te im ah awm hih. Ana pa lawng a ca rawi nalah, " Na nu ta mela a ceh?" a tina vengah Zubuihna kungah awm tila athui peh hih. Ana pa lawng a ca rawi te ama nu akhy sak. A capa lawng, " Anu apa kop va law pon, tahe im ah awm, apa lawng nang ng'khy sak" a tina. Tede ama nu lawng tangna nawh tih capa kah khyna awl te tula khaw sak peh nawh. " Mekah na pa? Na pa dyk tih phyl ah hai on n'tih pon teta, Haisa-e lah, haialh la coong pon teta. Na pa te phyl ah kamah ro lawng atui atheenla ka byh ka thawng tih, ka phih ka ra pon teta. Ka law thai nawh," atina. A zu lawng law hamla ngaih nawh tite a va lawng a ming vengah a canu te tlek kop a tuih bal. A canu lawngah, " Apa lawng ng'khysak, tahe im ah n'ring," a tina. Tede  a zu lawng tangna mangkhak nawh tih ceh pe nawh. Hukhyng khit atah aca te kop atuih bal. Lumha veng kah angla a khy de, athin thah mangkhak tih a capa hu ah ceh myhla a capa amah byng te im la a mel sak. Te vengah a capa lawng ana pa tengah, " Anu lawng apa nang he na dyk pon tih, phyl ah hai on kan tih pon. Metila a lawna kop tlaih ai? Haisa-e la coong pon ta, tila avan thui" tila ama nu awl te biit a thui pe.

Te vengah ana pa lawng," khaw ziin pon ai. Na nu he ka ring thlaih ma nawh," a tina. A capa te lupawng a pawng sak tih lupawng sawah aidii a ruk sak. A canu tekhaw, rengrk paai on kuning pathiim a ruk sak tih a ca rawi te imphu sawla a pawm hang congah hetila awl a yyn " Na pa kai tah ka mel pon ai. Ke kah tlangsawm ka pha vengah ka siksui ai. Na pa kai lawng ka siksui dawngah na lu saw kah aidii on raipaai na rukthli te tat ai," atina tih vik cet. A ca rawi lawng ana pa a khumpeelna hyn benla mang hih tih sut ngawl hih.

 A napa lawng tlangsawm a pha tih a siksui vengah a lu saw kah aidii on raipaai te a tat vengah tah," Aw, apa lawng a thuina angla tlangsawm a pha tang tang pon," ti hih. 

Khaw a ziin tawm veng dengla ama nu ta zurui ruila im la va mel. " Mela a pa law na ti hih bal? U lawng imphu sawla ng'ngawlh sak hih? U lawng, aidiithli on rapaaithli n'ruk sak hih" tila a doot. A ca rawi lawng, " Apa lawng imphu saw la ng'ngawlh sak hih. Aidii on raipaai khaw ng'ruk sak hih ta. Anu nang thlat na law nawh dawngah , apa lawng ng'ring thai lek tlaih nawh tih cet kop pon ta," tina hih. A ma nu lawng " Meben kah lawngpui kalawng na pa te a ceh?" tila a doot.Ana pa a khumna lawngpui te a thui pehih tih a va te a thlaak van de, khovoh khovoh thla tih ke thlaih nawh. Ka ke ai titih thama lah a thlak van de a khaw phuk athuih. "Pim sur" tila a rung a rah congah koupang ruila pahoi dyk.

Tekah huta te dyk tih Mawpi selkhui a pha vengah, " Ringma ca," tila ming a mingna tih, ahih lawng selkhui thlaangthli te a uk. Hutathli boih boih te mang a thun (Adek) pe. Mang aka thun nawh hutathli tah a dyk u vengah Mawpi selkhui la kuun thai nawh. Te dawngah laihaan thlaang hutathli boih lawng Mawpi selkhui la a kuun thaina ham mang a thun sak. Mang aka thun Ringma ca bro nawh theen, tite huhsakna hamla Tlumtle te diklai dawngah a van tuih.

Te dawngah hutathli mang thun myhla a dyk u hau atah Rangma ca impui khuila kuun thai u nawh my. Imle ben ka lawng ni a kuun tih thlaang kah tuihzoih mawsawng tamnaa la a hawna u, tila zaan veng kah nupathli lawng poo a thui u.

Te dangah ni Cum Daithli lawng Mawpi Selkhui la a phana u thai ham huta boih lawng mang a thun u. Mang a det thlanah huta ca zouthee ah a dyk hau atah a beengah amhawl khaw a thluk pe ngaikhoh u. Mang a det u mikhaai tah hingsyyp la awm tih , lungna kap ti. Mang a dek nawh mikhaai tah phithluung la awm. Zawng mikhaai on lou u, ana ti u. Te dawngah nuca paca Dai thli kah mang athunna tah Mawpi selkhui kah Ringma ca impui khuiah azooi kokla kuunna ham sai la awm. Tetila Ringma ca lawng mawpi selkhui te a uk cong atah thlangdykthli he lai haan kah thlangthli tengah kop va law u thlaih nawh.